গুৱাহাটী ১৭ নৱেম্বৰ : সোণালী জয়ন্তী বৰ্ষত পদাৰ্পণ কৰা মহানগৰীৰ হাতীগাঁও মহিলা সমিতিৰ সোণালী জয়ন্তী সমাৰোহৰ কালি আনুষ্ঠানিক ভাৱে শুভাৰম্ভ কৰা হয়। হাতীগাঁৱৰ কমলাকান্ত ভট্টাচার্য পথস্থিত হাতীগাঁও মহিলা সমিতিৰ কাৰ্যালয় প্ৰাংগণত পুৱা বৃক্ষৰোপণেৰে কাৰ্যসূচীৰ শুভাৰম্ভ কৰা হয়। ইয়াৰ পিছতে হাতীগাঁও মহিলা সমিতিৰ সভাপতি পুষ্পলতা দাসৰ নেতৃত্বত সমিতিৰ প্ৰাক্তন সভাপতি, সম্পাদক তথা জ্যেষ্ঠা সদস্যাই ৫০ খন পতাকা উত্তোলন কৰে। পতাকা উত্তোলনৰ সময়ত সমিতিৰ ৫০ গৰাকী সদস্যাই সমবেত কন্ঠত অ’ মোৰ আপোনাৰ দেশ গীতটি পৰিৱেশন কৰে। সমিতিৰ সদস্যা সকলে ৰাজীৱ শদিয়া, জুবিন গাৰ্গ, চৈয়দ ছাদুল্লা, দীপক শৰ্মা, ৰামচৰণ ভৰালীৰ উপৰিও সমিতিৰ প্ৰয়াত সদস্যা সকললৈ শ্ৰদ্ধাঞ্জলি জ্ঞাপন কৰে। ডা° নীলিমা ঠাকুৰীয়া হক, ডা° মকন শৰ্মা আৰু নীৰদা পাঠকে মুকলি কৰা অনুষ্ঠানত ৫০ গছি বন্তি প্ৰজ্বলন কৰা হয়। দুপৰীয়া অনুষ্ঠিত হোৱা অন্তৰংগ আলাপ অনুষ্ঠানত সমিতিৰ প্ৰাক্তন সভাপতি মিনা কুমাৰী ৰায়মেধিয়ে মহিলা সমিতি গঠনৰ সময়ৰ কঠিন সময়খিনি আৰু পৰৱৰ্তী সময়ৰ উত্তৰণৰ বিষয়ে আলোচনা কৰে। গুৱাহাটী পৌৰ নিগমৰ স্থানীয় পাৰিষদ মাছুমা বেগমে বিভিন্ন কামত হাতীগাঁও মহিলা সমিতিলৈ সহায়-সহযোগিতা আগবঢ়োৱাৰ প্ৰতিশ্ৰুতি দিয়ে। সমিতিৰ বিভিন্ন কামত সহযোগিতা আগবঢ়াই অহা অনিল দাস আৰু মণিৰাম দাসক অনুষ্ঠানত সন্মান জনোৱা হয়। মহিলা সমিতিৰ সম্পাদিকা অঞ্জনা দাস হাজৰিকাৰ পৰিচালনাত অনুষ্ঠিত মহিলা সমিতিৰ ইতিহাস সম্পৰ্কীয় কুইজ প্ৰতিযোগিতাত প্ৰথম পুৰস্কাৰ লাভ কৰে বীণা দাস হাজৰিকাই। দ্বিতীয় পুৰস্কাৰ লাভ কৰে পৰিস্মিতা দাসে আৰু তৃতীয় পুৰস্কাৰ লাভ কৰে নিজৰা জান্নাতে।
